Grindavík saman í sókn

Þann 12. nóvember hófst formlega verkefnið Grindavík – Saman í sókn með öflugum staðarfundi í Gjánni þar sem stjórnendur og lykilstarfsmenn frá 21 fyrirtæki í Grindavík komu saman til að hefja sameiginlegt starf í átt að endurreisn, eflingu og framtíðarmótun atvinnulífs bæjarins. Verkefnið stendur yfir frá nóvember 2025 til febrúar 2026.

Grindavík hefur lengi verið einn af lykiláfangastöðum á Reykjanesi og gegnir ferðaþjónustan því mikilvægu hlutverki í framtíðarsýn verkefnisins – bæði sem uppspretta verðmætasköpunar, ímyndar og samfélagslegs styrks.

Verkefnið er á vegum Sambands sveitarfélaga á Suðurnesjum, unnið í nánu samstarfi við Markaðsstofu Reykjaness, Hekluna, atvinnuþróunarfélag Suðurnesja og Grindavíkurbæ. Íslenski ferðaklasinn leiðir framkvæmd verkefnisins í samstarfi við marga góða aðila, s.s Sjávarklasann, Íslandsstofu og fleiri.

Verkefnið er fjármagnað úr sjóði Byggðaáætlunar 2022-2036.

Sterkur vilji, samstaða og framtíðarsýn

Á fundinum ríkti sterkur andi samstarfs og bjartsýni á framtíðina. Þátttakendur lýstu sameiginlegum vilja til að endurbyggja samfélagið, skapa ný tækifæri og efla atvinnulíf Grindavíkur með framsýni, seiglu og nýsköpun að leiðarljósi.

Í umræðum kom fram skýr þörf á að byggja á þeim sterku gildum sem Grindavík hefur löngum staðið fyrir. Jafnframt var bent á mikilvægi þess að auka skilning þeirra sem starfa utan svæðisins á sérstöðu Grindavíkur og tryggja að þau tækifæri sem felast í sameiginlegri nálgun atvinnulífsins verði nýtt til fulls.

Sérstaka athygli vakti þátttaka nýs fyrirtækis í sælgætisframleiðslu sem nýverið hefur hafið starfsemi í Grindavík – skýr vísbending um trú á framtíðinni og þann kraft sem býr í samfélaginu.

Sameiginlegur vettvangur atvinnulífsins

Verkefnið Grindavík – Saman í sókn er sameiginlegur vettvangur fyrirtækja í Grindavík til að:

• Efla rekstrarhæfni fyrirtækja eftir áföll.
• Auka verðmætasköpun og þróa ný verkefni.
• Styðja við uppbyggingu bæjarins til framtíðar.
• Styrkja tengsl og samvinnu ólíkra atvinnugreina.

Sérstök áhersla er lögð á ferðaþjónustu, bláa hagkerfið, þjónustu, skapandi greinar og iðnað – stoðir sem saman endurspegla fjölbreytni og styrk atvinnulífs Grindavíkur.

Fundarröð og vinnustofur

Fundurinn í Gjánni markaði upphaf að sex vinnustofulotum þar sem fyrirtækin taka þátt í samræðu, greiningu og framtíðarmótun á grundvelli aðferða samkeppnishæfni og klasasamstarfs.

Markmiðið er að kortleggja tækifæri, greina þarfir fyrirtækja og móta sameiginlega sýn til næstu ára.

Í ferðaþjónustunni felast einstök tækifæri til að segja sögu Grindavíkur á áhrifaríkan hátt, byggja upp upplifunarmiðaða þjónustu og styrkja jákvæða ímynd svæðisins í hugum gesta.

Hvaða sögu vilja Grindvíkingar segja?
Sú vinna verður leiðarljós áframhaldandi uppbyggingar og ímyndarvinnu bæjarins.

Þátttakendur í Grindavík – Saman í sókn

1. Fishhouse
2. Fisktækniskóli Íslands
3. Guðlaugsson ehf
4. Fjórhjólaævintýri ehf
5. Grindavíkurbær
6. Hérastubbur
7. Sæbýli hf.
8. PGV Framtíðarform ehf
9. Neskja ehf.
10. HH smíði
11. Converted Water Tower
12. Vísir ehf.
13. VIGT
14. Grindin ehf
15. Rúnar málari og Hárhornið
16. Vélsmiðja Grindavíkur ehf
17. Gistihús Grindavíkur ehf
18. Grindavík Seafood ehf
19. Hótel Grindavík
20. Sólskip ehf
21. Discover Grindavík