Grindavík – saman í sókn: Samstarf um framtíð og uppbyggingu Grindavíkur

Nýverið fór fram síðasta vinnustofa verkefnisins Grindavík – saman í sókn í Bláa lóninu, þar sem fulltrúar atvinnulífs, sveitarfélags og samstarfsaðila komu saman til að ræða niðurstöður verkefnisins og næstu skref í uppbyggingu atvinnulífs í Grindavík.

16.03.2026

Verkefnið hefur skapað mikilvægan vettvang fyrir samtal og samvinnu um hvernig styrkja megi atvinnulíf og samfélag í Grindavík eftir þær áskoranir sem bæjarfélagið hefur staðið frammi fyrir.

Í gegnum vinnustofur verkefnisins hafa fyrirtæki og hagsmunaaðilar rætt leiðir til að efla samstöðu, nýta sérstöðu svæðisins og byggja upp jákvæða ímynd Grindavíkur til framtíðar.

Á síðustu vinnustofunni í Bláa lóninu voru helstu niðurstöður verkefnisins dregnar saman og rætt um næstu skref í áframhaldandi uppbyggingu. Þar var meðal annars lögð áhersla á aukið samstarf, sameiginlega sýn og markvissa þróun sem styður við fjölbreytt og öflugt atvinnulíf.

Verkefnið miðar að því að skapa samfellu í uppbyggingu samfélags og atvinnulífs í kjölfar hamfara. Með samstarfi, þjálfun, markaðssetningu og virkni samfélagsins er markmiðið að stuðla að sjálfbærri endurreisn, aukinni seiglu og jákvæðri framtíðarsýn fyrir Grindavík.

Verkefnið hefur nú einnig fengið áframhaldandi styrk að upphæð 16,5 milljónir króna, sem styður við næsta áfanga verkefnisins og áframhaldandi vinnu við uppbyggingu og þróun svæðisins.