Hótel Keflavík fagnar 40 ára afmæli með glæsilegri hátíð á Vatnsnesi

Hótel Keflavik fagnar 40 ára afmæli sínu dagana 15.–17. maí með veglegri afmælishátíð undir yfirskriftinni Vor á Vatnsnesi. Um er að ræða fjölskylduvæna bæjarhátíð þar sem tónlist, listir, hreyfing, matur og fjölbreytt dagskrá fyrir alla aldurshópa verða í forgrunni.

Í fjóra áratugi hefur Hótel Keflavík tekið á móti gestum alls staðar að úr heiminum og verið stór hluti af uppbyggingu ferðaþjónustu á Reykjanesi. Afmælið markar því mikilvæg tímamót í sögu ferðaþjónustu á svæðinu og verður því fagnað með sérstakri dagskrá alla helgina.

Hápunktur hátíðarinnar verður laugardaginn 16. maí þegar svæðið við Vatnsnes fyllist af lífi og stemningu. Þar verður meðal annars boðið upp á KEF Moët kampavínshlaup, hoppukastala og leiksýningu fyrir börn, tónlistaratriði, vínsmökkun og stóra tónlistarveislu helgaða Bítlabænum Keflavík. Kvöldinu lýkur svo með glæsilegri flugeldasýningu.

Einnig verður opið hús í Vatnsnesi þar sem gestir geta skoðað endurbætur á húsinu og listasýningu með verkum eftir þekkta íslenska listamenn. Þá taka fyrirtæki í Reykjanesbæ þátt í hátíðinni með tilboðum og viðburðum víðs vegar um bæinn.

Vor á Vatnsnesi er nýr árlegur viðburður sem ætlað er að festa í sessi sem hlýleg bæjarhátíð í Reykjanesbæ þar sem samfélagið, menningin og gestir svæðisins koma saman og fagna vorinu.

Nánari upplýsingar og dagskrá má finna á Hótel Keflavík – 40 ára afmælishátíð