RATSJÁIN – Markaðsstofa Reykjaness tekur þátt í eflingu ferðaþjónustunnar

Markaðsstofa Reykjaness tók nýverið þátt í vinnustofuröðinni RATSJÁIN sem miðar að því að efla samkeppnishæfni og verðmætasköpun í íslenskri ferðaþjónustu. Þar fékk starfsfólk tækifæri til að dýpka þekkingu sína á lykilþáttum sem móta þróun áfangastaða og styrkja stöðu þeirra á síbreytilegum markaði.

11.02.2026

Íslenski ferðaklasinn og RATA standa að verkefninu RATSJÁIN sem hefur það að markmiði að efla samkeppnishæfni og auka verðmætasköpun í íslenskri ferðaþjónustu. Markaðsstofa Reykjaness tók þátt í sérstakri vinnustofuröð sem var sniðin að markaðsstofum landshlutanna og lauk með staðarlotu í Elliðaárstofu í lok janúar.

Vinnustofurnar voru fjórar talsins og fóru fram á tímabilinu nóvember til janúar. Þar var farið markvisst yfir lykilþætti sem skipta sköpum fyrir þróun áfangastaða og rekstur ferðaþjónustufyrirtækja:

Skilning á ferðamönnum og samkeppnisstöðu
Nýsköpun, hönnun og upplifun
Tækni og sjálfbærni sem drifkraftar
Fólkið, samskipti og árangursrík framkvæmd

Þátttakan var bæði lærdómsrík og hagnýt og veitti starfsfólki dýpri innsýn í þau tækifæri og áskoranir sem íslensk ferðaþjónusta stendur frammi fyrir. Sérstök áhersla var lögð á heildstæða nálgun í áfangastaðaþróun þar sem samspil upplifunar, nýsköpunar og sjálfbærni er lykilatriði.

Fyrir Markaðsstofu Reykjaness nýtist þessi vinna beint inn í áframhaldandi þróun og markaðssetningu Reykjaness sem öflugs og sjálfbærs áfangastaðar, þar sem áhersla er lögð á gæði, samkeppnishæfni og sterka stöðu svæðisins á innlendum og erlendum mörkuðum.

Markaðsstofa Reykjaness þakkar framkvæmdaraðilum kærlega fyrir faglegt og vel skipulagt verkefni og samstarfsfólki annarra markaðsstofa fyrir góða samvinnu. Slíkt samstarf styrkir stoðir ferðaþjónustunnar um land allt og eykur sameiginlegan slagkraft greinarinnar.